ງາມສະຫງ່າ ຊຸດປະຈໍາຊາດ ທີ່ສາວເມ ວິຈິດຕາ ຈະໃສ່ປະກວດ Miss Universe ທີ່ສະຫະລັດອາເມລິກາ

ເປີດເຜີຍອອກມາແລ້ວ ສໍາລັບຊຸດປະຈໍາຊາດລາວ ທີ່ສາວເມ ວິຈິດຕາ ພອນວິໄລ MISS UNIVERSE LAOS 2019 ຈະສວມໃສ່ຢູ່ເທິງເວທີ Miss Universe 2019ທີ່ສະຫະລັດອາເມລິກາ  ເຊິ່ງອອກແບບໂດຍ Khamphee

ແຮງບັນດານໃຈ ຂອງຊຸດະຈຳຊາດລາວ  ແມ່ນໄດ້ຈັບເອົາຊ້າງ ທີ່ຖືເປັນສັດປະຈຳຊາດຂອງລາວ ແຕ່ໃດມາ ທີ່ນຳເອົາລວດລາຍຂອງການເຄື່ອງສານ ທີ່ເຮົາພົບເຫັນໃນຮູບແບບ ຂອງແອບເຂົ້າ (ຕິບເຂົ້າ) ມາເປັນລວດລາຍຂອງຊ້າງພ້ອມທັງຕົກແຕ່ງດ້ວຍສັນຍາລັກຂອງຊາດ ກໍ່ຄືພະທາດຫລວງ ແລະ ທຸງຊາດລາວ ປະດັບດ້ວຍກິ່ນອາຍຂອງດອກຈຳປາ

ຄວາມໂດດເດັ່ນຂອງການອອກແບບໃນຄັ້ງນີ້ ບໍ່ແມ່ນພຽງແຕ່ ການນຳເອົາເອກະລັກຂອງຊາດ ຂຶ້ນສູ່ເວທີສາກົນພຽງຢ່າງດຽວ ແຕ່ຍັງໄດ້ສອດແຊກເນື້ອຫາ ເພື່ອເປັນການຮຽກຮ້ອງ ການໃຫ້ຄວາມສຳຄັນຕໍ່ການປົກປັກຮັກສາ ປ່າໄມ້ ກໍ່ຄື ທຳມະຊາດ ໂດຍການນຳເອົາ ປ່າອາເມໂຊນ ທີ່ປຽບເຫມືອນ “ປອດຂອງໂລກ” ທີ່ຖືກໄຟໄຫມ້ໄປສ່ວນຫນຶ່ງໃນບໍ່ດົນນີ້ ທີ່ເປັນການສູນເສຍທີ່ຂ້ອນຂ້າງສ້າງຜົນກະທົບຫລາຍສົມຄວນຕໍ່ກັບລະບົບນິເວດ ແລະ ສະພາບແວດລ້ອມບໍລິເວນນັ້ນ ເຊິ່ງຈະຕ້ອງໃຊ້ເວລາຍາວນານ ສຳລັບການຟື້ນຟູປ່າໄມ້

ເພື່ອໃຫ້ທຸກຄົນເຫັນເຖິງຄວາມສຳຄັນຂອງປ່າໄມ້ ໃນໂລກ ກໍ່ຄື ຢູ່ໃນລາວ ທີ່ນັບມື້ນັບຫລຸດຫນ້ອຍຖອຍລົງ