“ອາເລັກຊານດຣາ” ປະທັບໃຈ ສູນອະນຸຮັກສັດປ່າສວນສັດບ້ານເກິນເບິ່ງແຍງສັດເປັນຢ່າງດີ ກ່ອນປ່ອຍຄືນສູ່ປ່າ

ອາເລັກຊານດຣາ – ທິດາວັນ ບຸນຊ່ວຍ ສິລະປິນນັກຮ້ອງສາວທີ່ຫຼາຍຄົນຮູ້ກັນວ່າ ໄດ້ເຄື່ອນໄຫວເພື່ອປຸກລະດົມຕໍ່ຕ້ານການຄ້າສັດປ່າທີ່ຜິດກົດໝາຍມາດົນນານ ໂດຍສະເພາະໃນສ່ວນທີ່ຮ່ວມວຽກກັບສະຖານທູດອັງກິດປະຈຳລາວໃນປີທີ່ຜ່ານມາ.

ຫຼ້າສຸດ ສາວຄົນນີ້ໄດ້ໂພສພາບຂະນະທີ່ເດີນທາງໄປຢ້ຽມຢາມສູນອະນຸຮັກສັດປ່າສວນສັດບ້ານເກິນກັບຄະນະສະຖານທູດອັກງດິປະຈຳລາວ ພ້ອມທັງລະບຸວ່າ ຕົນເອງຮູ້ສຶກປະທັບໃຈທີ່ທາງສູນດັ່ງກ່າວດູແລເບິ່ງແຍງສັດປ່າເປັນຢ່າງດີ ເມື່ອແຂງແຮງດີກໍ່ປ່ອຍຄືນສູ່ປ່າ.

ອາເລັກຊານດຣາ ກ່າວກ່ຽວກັບການປົກປັກຮັກສາສັດປ່າໃນໂພສດັ່ງກ່າວວ່າ “ມັນແມ່ນໜ້າທີ່ພວກເຮົາທຸກຄົນທີ່ຈະອະນຸຮັກຊັບສິນຂອງຊາດ. ຊ່ວຍເປັນຫູເປັນຕາຊ່ວຍກັນໃຫ້ບ້ານເຮົາໄດ້ມີທໍາມະຊາດ ແລະ ສັດປ່າໄປຮອດຮຸ່ນຫຼານໆ.”

ໃນປີຜ່ານມາ ສາວຄົນນີ້ຮັບໜ້າທີ່ເປັນຜູ້ຕາງໜ້າປະເທດລາວ ຂຶ້ນກ່າວຕໍ່ໜ້າກອງປະຊຸມກ່ຽວກັບການຄ້າຂາຍສັດປ່າທີ່ຜິດກົດໝາຍ ເຊິ່ງຈັດຂຶ້ນທີ່ປະເທດອັງກິດໃນລະຫວ່າງວັນທີ 11-12 ຕຸລາ 2018 ໂດຍກອງປະຊຸມດັ່ງກ່າວນີ້ຈັດຂຶ້ນໂດຍມີຈຸດປະສົງເພື່ອເຜີຍແຜ່ ແລະ ປູກຝັງຈິດສຳນຶກທີ່ດີໃນການຕໍ່ຕ້ານການຄ້າສັດປ່າທີ່ຜິດກົດໝາຍ ໂດຍສະເພາະແມ່ນງາຊ້າງ ແລະ ຊິ້ນສ່ວນສັດອື່ນໆ.

ທັງນີ້ ອາເລັກຊານດຣາ ເປັນຜູ້ໜຶ່ງຈາກລາວທີ່ເປັນສ່ວນໜຶ່ງຂອງໂຄງການ Ivory Alliance ເຊິ່ງດຳເນີນໂດຍ ສະຖານທູດອັງກິດ ປະຈຳ ສປປ ລາວ